വെഞ്ഞാറമൂട്: കുഞ്ഞിനെ ഉപദ്രവിക്കുമെന്ന് ഭീഷണിപ്പെടുത്തി ഗർഭിണിയായ യുവതിയില്‍നിന്ന് രണ്ടരപ്പവൻ സ്വർണാഭരണം തട്ടിയെടുത്തു.ചെമ്പൂര് പരമേശ്വരം ശിവപാർവതിയില്‍ പാർവതിയുടെ സ്വർണാഭരണങ്ങളാണ് നഷ്ടപ്പെട്ടത്. കഴിഞ്ഞദിവസം പുലർച്ച രണ്ടിനാണ് സംഭവം. പാർവതിയും കു‍ഞ്ഞും മാതാവും മാത്രമാണ് സംഭവസമയം വീട്ടിലുണ്ടായിരുന്നത്. രാത്രിയില്‍ കുഞ്ഞിന്റെ കരച്ചില്‍ കേട്ട് പാർവതി ഉണരുമ്പോള്‍ ഒരാള്‍ കുട്ടിയുടെ അര‍ഞ്ഞാണം അറുത്തെടുക്കാൻ ശ്രമിക്കുന്നതാണ് കാണുന്നത്.
യുവതി ബഹളം വെച്ചതോടെ കുഞ്ഞിനെ അപായപ്പെടുത്തുമെന്ന് ഭീഷണി മുഴക്കിയ മോഷ്ടാവ് പാർവതി ധരിച്ചിരുന്ന രണ്ട് പവന്റെ മാല ഊരി വാങ്ങുകയായിരുന്നു. കൂടാതെ അലമാരയില്‍ ഉണ്ടായിരുന്ന നാല് ഗ്രാം സ്വർണവും കവർന്നു. വീണ്ടും ഇയാള്‍ സ്വർണത്തിനായി പരതിയെങ്കിലും കിട്ടിയില്ല.
ശരീരമാകെ മുണ്ടുകൊണ്ടുമൂടിയ തടിച്ച ഒരാളായിരുന്നെന്ന് വീട്ടുകാർ പറയുന്നു. മാലയിലെ താലി മോഷ്ടാവ് തിരികെ നല്‍കി. പിന്നീട് ഇയാള്‍ വീടിന്റെ പിൻവാതിലിലൂടെ പുറത്തുപോയതോടെ പാർവതി സമീപവാസികളെയും ബന്ധുക്കളെയും വിളിച്ചുവരുത്തി.
പരിശോധനയില്‍ വാതിലുകള്‍ക്ക് കേടുപാടില്ല. വീടിന്റെ വാതില്‍ തുറന്നുകിടന്ന ഏതോ സമയത്ത് മോഷ്ടാവ് വീട്ടിനുള്ളില്‍ കയറി മറ‍ഞ്ഞിരുന്നതാവാമെന്നാണ് സംശയിക്കുന്നത്.
