തിരുവനന്തപുരം : തിരുവനന്തപുരം മുതൽ കളിയിക്കാവിള വരെ നീളുന്ന തിരക്കേറിയ ദേശീയ പാതയുടെ പല ഭാഗങ്ങളിലെയും നടപ്പാതകൾ കടന്നുപോകാൻ പറ്റാത്ത നിലയിലാണ്. പച്ചപ്പിന്റെ പേരിൽ വളർന്ന് കിടക്കുന്ന കാടുകളും ഒപ്പം വലിച്ചെറിയുന്ന മാലിന്യങ്ങളും ചേർന്ന് ഈ നടപ്പാതകളെ ഭീഷണിയാക്കി മാറ്റിയിരിക്കുന്നു.
നടപ്പാതകളെക്കുറിച്ച് പല തവണ പരാതികൾ ഉയർന്നിട്ടുണ്ടെങ്കിലും, കാര്യമായ മാറ്റം ഉണ്ടാകുന്നില്ല എന്നതാണ് പൊതുജനങ്ങളിൽ വലിയ നിരാശയ്ക്ക് ഇടയാക്കുന്നത്. തിരുവനന്തപുരത്തെ വലിയ രീതിയിലുള്ള നഗരവികസനത്തിനിടയിലും ഇത്തരം അടിസ്ഥാന സൗകര്യങ്ങളിലുണ്ടാകുന്ന ഗൗരവക്കുറവ് ജനങ്ങൾക്കിടയിൽ ചർച്ചയാവുകയാണ്. ദുരിതം അനുഭവിക്കുന്നവരിൽ വലിയൊരു ശതമാനവും വിദ്യാർത്ഥികളും മുതിർന്നവരുമാണ്. ഇവർക്ക് സുരക്ഷിതമായി സഞ്ചരിക്കാൻ പറ്റുന്ന സാഹചര്യം ഒരുക്കുക അത്യാവശ്യമാണ്.
വാഹനഗതാഗതം ഇക്കാലത്ത് അതിവേഗം വർധിക്കുന്ന സാഹചര്യത്തിൽ, നടപ്പാതകളിലെ ഇത്തരം അനാസ്ഥകൾ അപകടം ക്ഷണിക്കുന്ന ഘട്ടത്തിലേക്കാണ് നയിക്കുന്നത്. യാതൊരു മുൻകരുതലുമില്ലാതെ നടപ്പാതയിൽ നിന്നും റോഡിലേക്ക് ഇറങ്ങേണ്ടിവരുന്നവരുടെ ജീവൻ പോലും അപകടത്തിലാവുന്ന സാഹചര്യം കൂടി ഉയർന്നുവരുന്നു.
പ്രതിദിനം സ്കൂൾ ബസുകളും, ഓഫീസുകൾക്കായി ഓടുന്ന വാഹനങ്ങളും, പബ്ലിക് വാഹനങ്ങളും പോകുന്ന ഈ ദേശീയപാതയിൽ, ഗതാഗതനിയമങ്ങൾ മാത്രമല്ല, നടപ്പാതയുടെ അവസ്ഥയും അതിന്റെ നിർമ്മിതി ഗുണമേന്മയും അതിജീവനത്തിന്റെ ഭാഗമാണ് എന്ന ബോധം അധികാരികൾക്കുണ്ടാകണം.
താത്കാലികമായ പരിഹാരമല്ല, നീണ്ടകാലം പ്രയോജനപ്പെടുന്ന സമഗ്ര നടപടികളാണ് ആവശ്യം. നാട്ടുകാർക്കും, ട്രാഫിക് വകുപ്പിനും, അതത് പ്രദേശത്തെ ജനപ്രതിനിധികൾക്കും ഇടയിൽ ചർച്ച നടത്തി, പ്രശ്നങ്ങളോട് കാഴ്ചപ്പാടോടെയും ഉത്തരവാദിത്വത്തോടെയും സമീപിക്കേണ്ട സമയം ഇതിനോടകം കഴിഞ്ഞു.
പള്ളിച്ചൽ പോലുള്ള വാഹന ഗതാഗതം നിസ്സാരമല്ലാത്ത സ്ഥലങ്ങളിൽ പോലും, നടപ്പാതയിൽ ഒരാൾപൊക്കത്തിൽ ചെടികൾ കയറി കിടക്കുകയും, പ്ലാസ്റ്റിക് മാലിന്യങ്ങൾ നിറഞ്ഞ് കിടക്കുകയും ചെയ്യുന്നു. വഴിനടക്കണം എങ്കിൽ തിരക്കേറിയ റോഡിലേക്ക് ഇറങ്ങേണ്ടി വരുന്ന അവസ്ഥ.
നടപ്പാത എന്നത് പേര് മാത്രമായി മാറുകയും അതിലൂടെ വലിയ വലിയ അപകടങ്ങളുമാണ് ജനങ്ങളെ കാത്തിരിക്കുന്നത് . ഇത്തരം അവസ്ഥ തുടർന്നാൽ, ഇത് നടപ്പാതയുടെ ആശയത്തെ തന്നെ പരിഹസിക്കുന്നതായിരിക്കും.
നഗരസഭയിലോ, മുനിസിപ്പാലിറ്റിയിലോ, പഞ്ചായത്തിലോ ഉള്ള ഉത്തരവാദിത്വമുള്ളവർ, അവരുടെ പരിധിക്കുള്ളിലെ നടപ്പാതകൾ ഇടവേളകളിൽ തന്നെ പാഴ്ചെടികൾ വെട്ടുകയും, മാലിന്യം എറിയുന്നവർക്കെതിരെ കർശന നടപടി സ്വീകരിക്കുകയും വേണം. അല്ലാതെ, പച്ചപ്പിന്റെ മറവിൽ പൊട്ടിക്കളയപ്പെടുന്നത് ജനങ്ങളുടെ സുരക്ഷയും സഞ്ചാരാവകാശവുമാകരുത്.
നടപ്പാതകൾ കെട്ടിപ്പടുക്കുന്നത് നഗരവികസനത്തിന്റെ ഭാഗം മാത്രമല്ല, ജനങ്ങളുടെ ജീവിത നിലവാരം ഉയർത്തുന്നതിനും അവരിൽ സുരക്ഷയുടെ ആശ്വാസം നൽകുന്നതിനുമാണ്. അതിനാൽ, ഈ വിഷയത്തിൽ അടിയന്തര ശ്രദ്ധയും പ്രവർത്തനവും മാത്രമേ ഒരു മാറ്റത്തിന് വഴിയൊരുക്കൂ.
