വെഞ്ഞാറമൂട്: വീടിന്റെ കതകിന് തീയിട്ട് കവര്‍ച്ച. അഞ്ച് പവൻ സ്വര്‍ണാഭരണങ്ങളും പതിനായിരം രൂപയും മറ്റ് സാധനങ്ങളും മോഷണം പോയി.കല്ലറ മീതൂര്‍ പാലാഴിയില്‍ ഗിരീഷിന്റെ വീട്ടില്‍ നിന്നാണ് പണവും സ്വര്‍ണാഭരണങ്ങളും നഷ്ടമായത്. പൂജാ അവധിയായതിനാല്‍ വീട്ടുകാര്‍ ശനിയാഴ്ച വിനോദയാത്രയ്ക്ക് പോയിരുന്നു. തിങ്കളാഴ്ച മടങ്ങിയെത്തിയപ്പോഴാണ് മോഷണവിവരം അറിയുന്നത്. വീടിന്റെ അടുക്കള വശത്തെ വാതില്‍ കത്തിച്ച്‌ പൊളിച്ചശേഷമാണ് മോഷ്ടാക്കള്‍ അകത്ത് കയറിയത്. കിടപ്പുമുറിയിലെ അലമാര പൊളിച്ചാണ് സ്വര്‍ണവും പണവും കവര്‍ന്നത്. പാങ്ങോട് പൊലീസില്‍ പരാതി നല്‍കി.
