കാസർഗോഡ്: നീലേശ്വരത്ത് പട്ടാപ്പകല്‍ വീട് കുത്തിതുറന്ന് സ്വർണ്ണവും പണവും കവർന്ന പ്രതി അറസ്റ്റില്‍.കൊട്ടാരക്കര എഴുക്കോണ്‍ ഇടക്കിടം സ്വദേശി അഭിരാജാണ് അറസ്റ്റിലായത്.സിസിടിവി ദൃശ്യങ്ങളാണ് വളരെ വേഗത്തില്‍ പ്രതിയിലേക്ക് എത്താൻ പൊലീസിന് സഹായകമായത്.
ഓട്ടോറിക്ഷാ ഡ്രൈവേർസ് യൂണിയൻ നീലേശ്വരം ഏരിയാ സെക്രട്ടറി ഒ.വി രവീന്ദ്രന്റെ വീട്ടില്‍ വ്യാഴാഴ്ചയാണ് കവർച്ച നടന്നത്. വീടിന്റെ മുൻവാതില്‍ കുത്തിത്തുറന്ന് അകത്ത് കയറിയ മോഷ്ടാവ് 20 പവൻ സ്വർണ്ണവും 10,000 രൂപയുമാണ് കൈക്കലാക്കിയത്. തിരുവനന്തപുരത്ത് മൃഗസംരക്ഷണ വകുപ്പ് ആസ്ഥാനത്ത് ജോലി ചെയ്യുന്ന, രവീന്ദ്രന്റെ മകള്‍ ആര്യയുടേതായിരുന്നു സ്വർണ്ണം. എന്നാല്‍ മോഷ്ടാവിന്റെ വ്യക്തമായ ഫോട്ടോ സിസിടിവി ക്യാമറയില്‍ പതിഞ്ഞിരുന്നു.
ദൃശ്യങ്ങള്‍ കിട്ടിയതാണ് പ്രതിയെ മണിക്കൂറുകള്‍ക്കകം പിടികൂടാൻ പൊലീസിനെ സഹായിച്ചത്. കോഴിക്കോട് വെച്ചാണ് നീലേശ്വരം പോലീസ് പ്രതിയെ കണ്ടെത്തി അറസ്റ്റ് ചെയ്തത്.
