കൊല്ലം : ശാസ്താംകോട്ടയില്‍ എസി പൊട്ടിത്തെറിച്ച്‌ അപകടം. പേരുവഴി ഇടയ്ക്കാട് വടക്ക് മുണ്ടുകുളഞ്ഞി ഭാഗത്താണ് എസി പൊട്ടിത്തെറിച്ച്‌ വീട് ഭാഗികമായി കത്തി നശിച്ചത്.പള്ളിപ്പറമ്പില്‍ ഡെന്നി സാമിന്റെ വീട്ടിലെ എസി പൊട്ടിത്തെറിക്കുകയായിരുന്നു. ഈ സമയം കുടുംബം പ്രാർത്ഥനയ്ക്കായി പള്ളിയില്‍ പോയതിനാല്‍ വൻ ദുരന്തം ഒഴിവായി.
മുറിയുടെ കതകും ജനാലകളും കട്ടിലും കിടക്കയും അടക്കം കത്തിച്ചാമ്പലായി. ചാരം മൂടിയ നിലയിലാണ് എസി പ്രവർത്തിച്ചിരുന്ന മുറി. ഇരുനില വീട് മുഴുവൻ കരിയും പുകയും പിടിച്ച്‌ നശിച്ച്‌ അവസ്ഥയിലാണ്. ശനിയാഴ്ച രാത്രി ഒമ്പത് മണിയോടെ ആയിരുന്നു വലിയ ശബ്ദത്തോടെ പൊട്ടിത്തെറിയുണ്ടായത്. വൻ ശബ്ദത്തോടെ പൊട്ടിത്തെറിയുണ്ടായെന്നും, ഇത് കേട്ട് എത്തിയപ്പോള്‍ വീട് ആകെ പുകയില്‍ മുങ്ങിയിരുന്നെന്നും നാട്ടുകാർ പറഞ്ഞു.പ്രദേശവാസികള്‍ ചേർന്ന് തീയണയ്ക്കാൻ ശ്രമിച്ചെങ്കിലും, പൂർണമായും അണയ്ക്കാൻ സാധിച്ചില്ല. തുടർന്ന് ശാസ്താംകോട്ടില്‍ നിന്ന് ഫയർഫോഴ്സ് എത്തിയാണ് തീ അണച്ചത്.
പൊട്ടിത്തെറിയില്‍ പുകമയത്തിലായിരുന്നു വീട് മുഴുവൻ. അതിനാല്‍ തന്നെ ഫയർഫോഴ്സ് ഏറെ പ്രയാസപ്പെട്ടാണ് തീ പൂർണമായും അണച്ചത്.
