മുൻ സുസുകി മോട്ടോഴ്സിന്റെ ചെയർമാനായിരുന്ന ഒസാമു സുസുക്കി 94-ാം വയസ്സില്‍ അന്തരിച്ചു. ഇന്ത്യൻ ഓട്ടോമൊബൈല്‍ മേഖലയുടെ തലവര മാറ്റിയ വ്യക്തിയായിരുന്നു അദ്ദേഹം.ലിംഫോമ ബാധിച്ച്‌ ചികിത്സയിലായിരുന്ന ഒസാമു സുസുക്കി ഡിസംബർ 25 നാണ് മരിച്ചത്.1980ല്‍ ഇന്ത്യൻ വിപണിയിലേക്ക് വന്ന സുസുകി പിന്നീട് രാജ്യത്തെ ഏറ്റവും വലിയ കാർ നിർമാതാക്കളായ മാറി. അതിനു പിന്നില്‍ ഒസാമു സുസുകി വഹിച്ച പങ്ക് ചെറുതല്ല. 1983-ല്‍ പുറത്തിറങ്ങിയ മാരുതി 800 ഇന്ത്യയില്‍ ഒരു പുതിയ യുഗത്തിന് തുടക്കമിടാൻ കാരണം ഒസാമു സുസുകിയാണ്.ജപ്പാനിലെ ജെറോയില്‍ 1930 ജനുവരി 30 നാണ് ഒസാമു ജനിച്ചത്. സുസുകി സ്ഥാപകനായ മിഷിയോ സുസുകിയുടെ പേരക്കുട്ടിയെ വിവാഹം കഴിച്ചാണ് ഒസാമു സുസുകി കുടുംബത്തില്‍ അംഗമാകുന്നത്. സുസുകി കുടുംബത്തില്‍ അനന്തരാവകാശി ഇല്ലാതിരുന്നതിനാല്‍ ഒസാമുവിന്റേത് ദത്തെടുക്കല്‍ വിവാഹമായിരുന്നു.
