കഴക്കൂട്ടം: മദ്യലഹരിയില്‍ യുവാവിന്‍റെ തലക്കടിച്ച്‌ പരിക്കേല്‍പിച്ച പ്രതി പിടിയില്‍. തുമ്പ സ്വദേശി നിയാസിനെയാണ് തുമ്പ പൊലീസ് പിടികൂടിയത്. ഇക്കഴിഞ്ഞ 28ന് വൈകീട്ട് 6.30ഓടെ കഴക്കൂട്ടം യു.എസ്.ടി ഗ്ലോബലിന് സമീപമുള്ള ബാറില്‍ മദ്യപിച്ച നിയാസ് അവിടെവച്ച്‌ മറ്റൊരാളുമായി വാക്കുതര്‍ക്കം ഉണ്ടാവുകയും തുടര്‍ന്ന് അയാളുടെ തലക്കടിച്ച്‌ മാരകമായി പരിക്കേല്‍പിക്കുകയും ചെയ്തു. സി.സി.ടി.വിയുടെ അടിസ്ഥാനത്തിലാണ് പ്രതിയെ പൊലീസ് തിരിച്ചറിഞ്ഞത്. തുമ്പ പൊലീസ് സ്റ്റേഷൻ പരിധിയിലെ സ്ഥിരം കുറ്റവാളിയാണ് നിയാസ്.
