കൊല്ലം: കൊല്ലത്ത് രാസലഹരിയുമായി യുവാവ് പിടിയില്‍. അഞ്ചല്‍ സ്വദേശിയില്‍ നിന്ന് പിടികൂടിയത് എല്‍എസ്‍ഡി സ്റ്റാമ്പും കഞ്ചാവും.മാസങ്ങള്‍ക്ക് മുൻപ് എംഡിഎംഎയുമായി എക്സൈസ് ഉദ്യോഗസ്ഥനോടൊപ്പം പിടിയിലായ പ്രതിയാണ് പൊലീസിന്‍റെ പിടിയിലായത്.അഞ്ചല്‍ പനച്ചവിള ആലക്കുന്ന് വിളയില്‍ വീട്ടില്‍ 28 വയസ്സുള്ള അല്‍ സാബിത് ആണ് എല്‍ എസ് ഡി സ്റ്റാമ്പും കഞ്ചാവുമായി പിടിയില്‍ ആയത്. കൊല്ലം റൂറല്‍ ഡാൻസാഫ് ടീമാണ് പ്രതിയെ പിടികൂടിയത്. പ്രതിയില്‍ നിന്ന് 22 എല്‍എസ്‍ഡി സ്റ്റാമ്പുകളും കഞ്ചാവും ആണ് പൊലീസ് പിടിച്ചെടുത്തത്. എംഡിഎംഎ കേസില്‍ പിടിയില്‍ ആയി ജാമ്യത്തില്‍ ഇറങ്ങിയ ആളാണ് അല്‍ സാബിത്.ഏറെ നാളുകളായി ഡാൻസാഫ് സംഘം അല്‍സാബിത്തിനെ നിരീക്ഷിച്ചു വരുകയായിരുന്നു. ആലക്കുന്നിലെ വീട്ടില്‍ എത്തിയാണ് പ്രതിയെ പിടികൂടിയത്. പ്രദേശത്ത് ലഹരി സംഘങ്ങള്‍ രൂക്ഷം ആണെന്ന് നാട്ടുകാരും പറയുന്നു.
