തിരുവല്ല : ട്രാവല്‍ ബാഗില്‍ ഒളിപ്പിച്ച്‌ കടത്തുകയായിരുന്ന ഒരു കിലോ ഗ്രാം കഞ്ചാവുമായി കുറ്റപ്പുഴ സ്വദേശിയായ യുവാവ് തിരുവല്ല റെയില്‍വേ സ്റ്റേഷനില്‍ നിന്നും പോലീസിന്റെ പിടിയിലായി.കുറ്റപ്പുഴ ആമല്ലൂര്‍ പുതുപ്പറമ്ബില്‍ വീട്ടില്‍ അഖില്‍ ബാബു (22) ആണ് പിടിയിലായത് . ബുധനാഴ്ച രാവിലെ പത്തരയോടെ എറണാകുളത്ത് നിന്നും ഗുരുവായൂര്‍ എക്സ്പ്രസില്‍ എത്തിയ അഖിലിനെ ട്രെയിനില്‍ നിന്നും ഇറങ്ങി വീട്ടിലേക്ക് പോകും വഴി ഡാന്‍സാഫ് സംഘവും തിരുവല്ല പോലീസും ചേര്‍ന്ന് പിടികൂടുകയായിരുന്നു.ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തെ തുടര്‍ന്നാണ് പ്രതിയെ പിടികൂടിയത്. റെയില്‍വേ സ്റ്റേഷനിലെ മൂന്നാം പ്ലാറ്റ്ഫോമില്‍ ട്രെയിന്‍ ഇറങ്ങി വീട്ടിലേക്ക് പോകും വഴി പിന്തുടര്‍ന്ന ഡാന്‍സാഫ് സംഘത്തെ കണ്ട് ഓടി രക്ഷപ്പെടാന്‍ ശ്രമിച്ച അഖിലിനെ റോഡിന്റെ പല ഭാഗത്തായി നിലയുറപ്പിച്ചിരുന്ന പോലീസ് സംഘം ഓടിച്ചിട്ട് പിടികൂടുകയായിരുന്നു.
