അങ്കമാലി: ഷെയർ ട്രേഡിംഗിന്റെ മറവില്‍ ലക്ഷങ്ങള്‍ തട്ടിയ കേസില്‍ ഒരാള്‍ അറസ്റ്റില്‍. മലപ്പുറം പതാക്കര കുന്നപ്പിള്ളി കുറവക്കുന്നേല്‍വീട്ടില്‍ സജീർ മുഹമ്മദിനെയാണ് (21) അങ്കമാലി പൊലീസ് അറസ്റ്റുചെയ്തത്.കവരപ്പറമ്ബ് സ്വദേശിക്കാണ് 8810000 രൂപ നഷ്ടമായത്. ഷെയർ ട്രേഡിംഗ്‌ കമ്ബനിയുടെ പേരില്‍ ഷെയറെടുത്ത് തരാമെന്ന് മെസേജ് വഴിയും മെസേജുകളിലെ ലിങ്ക് വഴിയും പരാതിക്കാരനെ പറഞ്ഞ് വിശ്വസിപ്പിച്ച്‌ ഇയാളുടെ വിവിധ ബാങ്ക് അക്കൗണ്ടുകള്‍ വഴി കഴിഞ്ഞ ഏപ്രില്‍മുതല്‍ ജൂണ്‍വരെയുള്ള കാലയളവില്‍ പണം കൈപ്പറ്റുകയായിരുന്നു. തുടർന്ന് പണവും ബനഫിറ്റും നല്‍കാതെ കബളിപ്പിച്ചു. അറസ്റ്റിലായ യുവാവിന്റെ അക്കൗണ്ട് വഴി ലക്ഷങ്ങളുടെ ഇടപാടാണ് നടന്നിട്ടുള്ളത്. കമ്മീഷൻ വ്യവസ്ഥയിലാണ് പണമിടപാട് നടത്തുന്നത്. ഇയാളുടെ സുഹൃത്തുക്കളും ഇതുപോലെ അക്കൗണ്ടുകള്‍ എടുത്തിട്ടുണ്ടെന്നും പിന്നില്‍ വൻതട്ടിപ്പു സംഘം പ്രവർത്തിക്കുന്നുണ്ടെന്നുമാണ് സൂചന.
