കൊച്ചി: കേരളത്തെ നടുക്കി ഒരു കൊലപാതകം കൂടി. ആലുവയില്‍ അനുജൻ ജ്യേഷ്ഠനെ വെടിവെച്ചു കൊലപ്പെടുത്തി.എടയപ്പുറം തൈപ്പറമ്പില്‍ വീട്ടില്‍ പോള്‍സനാണ് മരിച്ചത് (48). അനുജൻ തോമസിനെ പൊലീസ് കസ്റ്റഡിയിലെടുത്തു. ഹൈക്കോടതി സെക്ഷൻ ഓഫിസറാണ് കൃത്യം നിര്‍വഹിച്ച പ്രതി.വീടിനു മുന്നില്‍ പാര്‍ക്ക് ചെയ്ത ബൈക്കിനെ ചൊല്ലിയുള്ള തര്‍ക്കമാണ് കൊലപാതകതിന് കാരണം. ഇന്നലെ രാത്രി 11 മണിയോടെയാണ് സംഭവം. കുറച്ചു ദിവസമായി തന്നെ ബൈക്ക് പാര്‍ക്കിംഗിനെ ചൊല്ലി ഇരുവര്‍ക്കുമിടയില്‍ തര്‍ക്കം ഉടലെടുത്തിരുന്നു. ഇത് വാക്കേറ്റവും കയ്യാങ്കളിയുമായി ആയതോടെയാണ് വെടിവെപ്പിലും കൊലപാതകത്തിലും കലാശിച്ചത്.ഇരുവരും പിതാവിനൊപ്പം ഒരു വീട്ടിലാണ് താമസം. പാര്‍ക്കിങ്ങിനെച്ചൊല്ലിയുണ്ടായ തര്‍ക്കത്തെ തുടര്‍ന്ന് തോമസിന്റെ ബൈക്ക് രാവിലെ പോള്‍സൻ അടിച്ചു തകര്‍ത്തിരുന്നു. ഇതിനെതിരെ തോമസ് പൊലീസില്‍ പരാതി നല്‍കുകയും ചെയ്തു. ഇന്നലെ രാത്രിയോടെ ഇതേചൊല്ലം വീണ്ടും തര്‍ക്കമുണ്ടായി. വാക്കുതര്‍ക്കത്തിനിടെ എയര്‍ഗണ്‍ ഉപയോഗിച്ച്‌ തോമസ് പോള്‍സനെ വെടിവെക്കുകയായിരുന്നു.തോമസ് തന്നെയാണ് വിവരം പൊലീസിനെ അറിയിച്ചത്.
