കോട്ടയം: റോഡിലൂടെ സഞ്ചരിച്ച കണ്ടെയ്നര്‍ ലോറിയില്‍ കുരുങ്ങി വൈദ്യുതി ലൈന്‍ പൊട്ടിവീണു. ചുങ്കം പഴയസെമിനാരി ജങ്ഷനില്‍ ചൊവ്വാഴ്ച രാത്രി 9.20 ഓടെയായിരുന്നു അപകടം സംഭവിച്ചത്.കോട്ടയത്തുനിന്ന് മെഡിക്കല്‍ കോളേജ് ഭാഗത്തേക്ക് പോകുകയായിരുന്നു കണ്ടെയ്നര്‍ ലോറി.ഇതിനിടെ റോഡിനുമുകളിലൂടെയുള്ള ലൈനില്‍ കണ്ടെയ്നറി‍ന്‍െറ മുകള്‍വശം തട്ടുകയും വലിയതീപ്പൊരിയോടെ ലൈന്‍ പൊട്ടിവീഴുകയുമായിരുന്നു. ഇത് പ്രദേശത്ത് വലിയ പരിഭ്രാന്തിക്കിടയാക്കി. തുടര്‍ന്ന് പോലീസ് എത്തി ഗതാഗതം നിയന്ത്രിച്ചു. സംഭവത്തെതുടര്‍ന്ന് ഏറെനേരം പ്രദേശത്ത് വൈദ്യുതിയും മുടങ്ങി. കുടയംപടിയിലും ഇതേ കണ്ടെയ്നര്‍ തട്ടി വൈദ്യുതി ലൈന്‍ പൊട്ടിവീണു. ഇതോടെ നാട്ടുകാര്‍ ഇടപെട്ട് കണ്ടെയ്നര്‍ ലോറി തടഞ്ഞിട്ടു. ഡ്രൈവറുടെ അശ്രദ്ധയാണ് അപകടകാരണമെന്ന് നാട്ടുകാര്‍ ആരോപിച്ചു.
