ബാങ്കോക്ക്: മ്യാന്മാറിലെ ബുദ്ധ വിഹാരത്തില്‍ കൂട്ടക്കൊല. മൂന്ന് ബുദ്ധ സന്യാസിമാര്‍ ഉള്‍പ്പെടെ 22 പേര്‍ വെടിയേറ്റു മരിച്ചതായി റിപ്പോര്‍ട്ട്. മ്യാന്മറിലെ ഷാന്‍ സംസ്ഥാനത്തെ നാന്‍ നെയ്ന്റ് ബുദ്ധ വിഹാരത്തിലാണ് ആക്രമണം ഉണ്ടായത്. കഴിഞ്ഞയാഴ്ച നടന്ന സംഭവം പട്ടാള ഭരണകൂടം നടത്തിയ കൂട്ടക്കൊലയാണെന്ന് പ്രവാസി ദേശീയ സര്‍ക്കാര്‍ ആരോപിച്ചു. എന്നാല്‍, സേന ആരെയും വധിച്ചിട്ടില്ലെന്ന് പട്ടാള ഭരണകൂടത്തിന്റെ വക്താവ് സാ മിന്‍ പറഞ്ഞു. വിമത ഗ്രൂപ്പുകളുടെ ആക്രമണത്തിലാകാം ആളുകൾ കൊല്ലപ്പെട്ടതെന്നും അദ്ദേഹം പറഞ്ഞു.എന്നാല്‍ സംഭവത്തിലെ യാഥാര്‍ത്ഥ്യമെന്തെന്ന് ഇനിയും പുറത്ത് വന്നിട്ടില്ല. ബുദ്ധ വിഹാരത്തിനുള്ളില്‍ കൂട്ടക്കൊല നടത്തിയത് എന്തിനെന്നും വ്യക്തമല്ല. ബുദ്ധവിഹാരത്തിനുള്ളിലാണ് എല്ലാ മൃതദേഹങ്ങളും കിടന്നിരുന്നത്. വെടിയേറ്റാണ് എല്ലാവരും മരിച്ചതെന്ന് പോസ്റ്റ് മോര്‍ട്ടം റിപ്പോര്‍ട്ടില്‍ പറയുന്നു. കെഎന്‍ഡിഎഫ്, കെആര്‍യു വിമത പോരാളി സംഘങ്ങളുടെ ആക്രമണവും അവരെ നേരിടുന്നതിനായി
സര്‍ക്കാര്‍ സേനയുടെ പ്രത്യാക്രമണവും രണ്ടാഴ്ചയായി നാന്‍ നെയ്ന്റില്‍ നടക്കുന്നുണ്ട്.
