തിരുവനന്തപുരം: എണ്ണ-വാതക മേഖലയെ ബാധിക്കുന്ന ആഗോള തലത്തിലുള്ള അനിശ്ചിതത്വങ്ങൾ നിലനിൽക്കെത്തന്നെ, ഇന്ത്യൻ ഓയിൽ, ബിപിസിഎൽ, എച്ച്പിസിഎൽ എന്നീ പൊതുമേഖലാ എണ്ണ വിപണന കമ്പനികൾ കേരളത്തിലുടനീളം പെട്രോൾ, ഡീസൽ, ദ്രവീകൃത പെട്രോളിയം ഗ്യാസ് എന്നിവയുടെ ലഭ്യത ഉറപ്പുവരുത്തുന്നതായി ഇന്ത്യൻ ഓയിൽ കോർപറേറ്റ് കമ്യൂണിക്കേഷൻസ് സീനിയർ മാനേജർ രാജശേഖർ രാജാറാം പറഞ്ഞു.
ടെർമിനലുകൾ, ഡിപ്പോകൾ, എൽപിജി ബോട്ട്ലിംഗ് പ്ലാന്റുകൾ, റീട്ടെയിൽ ഔട്ട്ലെറ്റുകൾ എന്നിവ ഉൾപ്പെടുന്ന വിപുലമായ വിതരണ ശൃംഖലയിലൂടെ ഇന്ധനങ്ങളുടെ തടസ്സമില്ലാത്ത ലഭ്യത ഉറപ്പാക്കാൻ എണ്ണ കമ്പനികൾ പൂർണ്ണമായും സജ്ജമാണ്. നിശ്ചയിച്ചിട്ടുള്ള സുരക്ഷാ, പ്രവർത്തന മാനദണ്ഡങ്ങൾക്കനുസരിച്ച്, എല്ലാ ഔട്ട്ലെറ്റുകളിലും ഇന്ധനം വിതരണം ചെയ്യുന്ന പ്രവർത്തനങ്ങൾ സുഗമമായി തുടരുകയും വിതരണം ഒരു നിയന്ത്രണവുമില്ലാതെ നിലനിർത്തുകയും ചെയ്യുന്നു.
വിതരണ ശൃംഖലയിലുടനീളം പെട്രോളിയം ഉൽപ്പന്നങ്ങളുടെ ആവശ്യത്തിന് ശേഖരം ലഭ്യമാണ്, യഥാർത്ഥ ഉപഭോക്തൃ ആവശ്യം കാര്യക്ഷമമായി നിറവേറ്റുന്നതിനായി ശേഖരം തുടർച്ചയായി നികത്തുന്നുമുണ്ട്. ഗാർഹിക ഉപഭോക്താക്കൾക്കുള്ള എൽപിജി വിതരണവും സാധാരണ നിലയിൽ നിലനിർത്തുന്നുണ്ട്, സംസ്ഥാനത്തുടനീളം വിതരണം സുഗമമായി പുരോഗമിക്കുകയാണ്.
